Чăваш халăх ӳнерĕ нумай енлĕ. Унăн тĕслĕхĕсенчен пĕри – тĕрĕ эрешĕ. Мĕн авалтанпах чăвашсем тĕрленĕ, илемлĕхе туйма, курма пĕлнĕ. Çаванпа кил-çурт таврашне тĕрленĕ япаласемпе илемлетнĕ.

Чăваш тĕрри – халăх пурнăçĕн тĕкĕрĕ тесе каласан йăнăш пулмĕ, мĕншĕн тесен эрешсем урлă эпир чăвашсен ĕçĕ-хĕлĕпе, йăли-йĕркипе, çут çанталăк илемĕпе паллашатпăр. Унсăр пуçне «тĕнче тытăмĕ çинчен шухăшланине» асăрхама пулать тесе палăртаççĕ ăсчахсем.

Ачасене тĕрĕ-эреш «тĕнчипе» паллаштарас тĕллевпе чӳк уйăхĕн 25-мĕшĕнче Перçырлан шкулĕнчи библиотека ĕçченĕпе чăваш чĕлхипе литература вĕрентекенĕ кĕнеке выставки йеркелерĕç. Çак кĕнекесене тытса пăхакан ачасем илемлĕ тĕрĕ «тĕнчине» лекрĕç. Кунта мĕн тĕрлĕ эреш çук-ши! Калама та çук пуян та илемлĕ чăваш тĕрри!

Çитĕнсе пыракан ăрăва илемлĕхе туйма, курма вĕрентмелле. Ăна ăсталас ĕçе явăçтарма тăрăшмалла.