«И.Я.Яковлев – чăваш халăхне çутта кăлараканĕ» презентаци куравĕ
Чăваш Республикинче 1992 çултанпа ака
уйăхĕн 25-мĕшĕнче Чăваш чĕлхи кунне паллă тăваççĕ. Çак кун Иван Яковлевич
Яковлев – чăваш халăхне çутта кăлараканĕ - çуралнă. Кăçал вăл çуралнăранпа 175
çул çитет. Яланхи йăлапа ака уйăхĕн 18-мĕшĕнче
Пĕрçырланти пĕтĕмĕшле пĕлӳ паракан шкулта чăваш чĕлхипе литература эрни
уçăлчĕ. Унăн планĕпе чăваш чĕлхипе литература вĕрентекенĕ паллаштарчĕ, ачасене
палăртнă мероприятисенче хутшăнма ăнăçу сунчĕ. Мероприятисен тĕллевĕ: ачасене
Аслă Вĕрентекенĕмĕрĕн пурнăçĕпе манăçми ĕçĕ-хĕлĕ çинчен ытларах пĕлме
хавхалантарасси, хамăр халăх чĕлхине, историне, йăли-йĕркине хисеплеме, юратма
вĕрентесси.
Кĕçĕн класра вĕренекенсене Пĕрçырлан ял
çумĕнчи библиотека ĕçченĕ „И.Я.Яковлев – чăваш халăхне çутта кăлараканĕ“
презентаципе паллаштарчĕ. Çитĕнсе пыракан ăрăва Аслă Вĕрентекенĕмĕр пурнăçĕпе
пултарулăхĕ, унăн пархатарлă ĕçĕсем питĕ кăсăклантарчĕç. Чăваш халăхне çутта
кăларас ĕçре унăн тӳпи пысăк пулнине ăнкарса илчĕç.